Aliyekuwa Jaji Mkuu David Maraga ametishia kuchukua hatua za kisheria kupinga kuidhinishwa kwa Mswada wa Marekebisho ya Uchaguzi wa mwaka 2024 na Bunge la Kitaifa, mswada ambao unaondoa sharti la kupeperusha matokeo kutoka vituo vya kupigia kura moja kwa moja. Maraga alikemea hatua hiyo, akisisitiza kuwa hakuna sheria iliyo juu ya Katiba na kwamba chaguzi lazima ziwe sahihi, ziweze kuthibitishwa, na ziwe za uwazi. Alisema anashirikiana na muungano wa 'People’s Coalition for Electoral Reforms' kupinga juhudi hizo, ambazo alionya kuwa zinaweza kuirudisha Kenya katika nyakati za giza.