Nyamira: Mtahiniwa wa KCSE azirai baada ya kudaiwa kuzabwa makofi na afisa wa mtihani

Mtahiniwa wa kike katika shule ya upili ya wasichana ya Sironga ameripotiwa kuzirai katika chumba cha mtihani baada ya kudaiwa kushambuliwa kwa makofi na afisa wa kulinda mtihani unaoendelea wa KCSE.

Kwa mujibu wa ripoti mbalimbali, Afisa huyo wa uhakiki wa ubora anasemekana kuzuru shule hiyo ya kitaifa Jumanne asubuhi ili kutathmini maendeleo ya majaribio yanayoendelea.

Alipokuwa akiingia kwenye chumba kimoja cha mtihani, aliona mtahiniwa akitafuna kitu ambacho alishuku kuwa hakikuidhinishwa katika chumba cha mtihani.

Kulingana na ripoti ya polisi, afisa huyo alisonga alipokuwa mtahiniwa huyo na kumshukia kwa makofi kadhaa kabla ya kuondoka shuleni.

Kufuatia kupigwa kofi, mtahiniwa huyo alibaki bila utulivu alipokuwa akifanya karatasi yake ya asubuhi kabla ya kuanguka kwenye chumba cha mtihani.

Alikimbizwa katika zahanati ya shule, ambapo hali yake ilikuwa ikiendelea.

"Uchunguzi wa tukio hilo umeanza na maelezo zaidi yatafuata," ilisoma sehemu ya ripoti ya polisi.

“Ni makosa kumshambulia mtu. Mwanafunzi tayari amejaza fomu ya P3. Tutategemea walioshuhudia tukio hilo na ikiwa kuna ushahidi wa kutosha, basi tutamkamata afisa huyo na kumshtaki mahakamani,” Bw Kiboro Mwaniki, afisa mkuu wa upelelelezi wa makosa ya jinai alisema.