Murkomen Sasa Aonya Polisi Dhidi ya Kutumia Bunduki Kiholela

Waziri wa Usalama wa Ndani Kipchumba Murkomen ametuma onyo kali kwa wahusika wa vurugu wakati wa maandamano, akisema kuwa watakabiliwa vilivyo kwa mujibu wa sheria.

Murkomen alisema kuwa operesheni zilizoongozwa na taarifa za kiintelijensia katika kaunti mbalimbali zimepelekea kukamatwa kwa watu wanaoaminika kuwa waandalizi, wafadhili, wachochezi na watekelezaji wa moja kwa moja wa vitendo hivyo vya uhalifu.

Kikundi hicho kimejumuisha waliotoa matamshi ya kuchochea ghasia na wanaojihusisha na uhamasishaji wa kisiasa uliolenga kuzua machafuko ya umma.

“Wale waliowachochea, kupanga, kufadhili au kutekeleza mashambulizi haya watakabiliwa na mkono kamili wa sheria. Wafadhili na wanasiasa waliodhamini vurugu hizi wanachunguzwa na hivi karibuni watajibu mashtaka yao,” alisema Murkomen.

“Kwa wafadhili, waandaaji na watekelezaji, fahamuni... utawala huu wa hofu dhidi ya Wakenya na dharau ya magenge ya kihalifu lazima ukome kwa gharama yoyote ile,” aliongeza.

Alisema kuwa matukio yaliyoshuhudiwa tarehe 25 Juni na 7 Julai yalithibitisha kwa uwazi kiwango ambacho wafadhili wa vurugu hizi wako tayari kufikia ili kukiuka Katiba.

“Haya hayakuwa maandamano. Huu ulikuwa uhalifu uliopangwa kwa makusudi: wa makusudi, hatari na wa kusikitisha mno,” alisema.

“Uvamiaji wa hospitali, ubakaji, kushambulia magari ya wagonjwa, uporaji wa biashara, kuingia kwa nguvu maeneo yanayolindwa, uharibifu wa mali, kuweka vizuizi haramu barabarani na kuchoma moto majengo ya serikali ukiwemo vituo vya polisi na ofisi za utawala ni uhalifu mkubwa na lazima ushughulikiwe ipasavyo,” aliongeza.

Murkomen alifichua kuwa takriban watu 1,500 wamekamatwa kote nchini na wanakabiliwa na mashtaka mbalimbali ikiwemo ugaidi, mauaji, uporaji kwa kutumia nguvu, unyanyasaji wa kingono, uchomaji moto, uharibifu wa mali kwa makusudi, na mashambulizi ya kulenga miundombinu muhimu.

“Kati yao, watu 50 wanachunguzwa na Kitengo cha Upelelezi wa Uhalifu Mkubwa, huku kesi 71 zikishughulikiwa na Kitengo cha Polisi wa Kupambana na Ugaidi kwa makosa yanayohusiana na vitendo vya kigaidi,” alisema.

“Tunayapongeza majeshi yetu ya usalama kwa kuzuia uharibifu zaidi na tunawatakia ahueni ya haraka waliojeruhiwa wakati wa ghasia hizo za kipekee. Operesheni hii ilifanikiwa kupitia taarifa za kiintelijensia zilizofichua mipango ya kushambulia miundombinu muhimu ikiwemo mifumo ya usafiri,” aliongeza.

Vivyo hivyo, afisa yeyote wa polisi atakayepatikana ametumia nguvu kupita kiasi au kinyume cha sheria atachukuliwa hatua za kisheria.

“Kwa sasa, afisa mmoja wa polisi tayari amefikishwa mahakamani akikabiliwa na mashtaka ya mauaji. Zaidi ya hapo, matendo yoyote ya kupita kiasi na maafisa wa usalama yatachunguzwa na hatua mwafaka zichukuliwe kwa waliohusika,” alisema.

“Kwa kuzingatia mjadala mkali unaoendelea na wasiwasi wa kitaifa kuhusu matumizi ya nguvu na silaha na maafisa wa usalama, siku ya Ijumaa, kwa mujibu wa Kifungu cha 245(4) cha Katiba, nitatoa agizo rasmi kwa Inspekta Jenerali wa Polisi kuhusu matumizi ya nguvu na silaha na maafisa wa usalama,” alibainisha.

Aliwataka wananchi wote kukataa na kulaani vitendo vya vurugu.

“Nawaomba Wakenya wote kuwasilisha malalamiko yao kupitia njia halali na za kikatiba, na kuwanyima wahalifu fursa ya kuharibu nchi yetu,” alisema.

“Hatufai kama Serikali na kama Taifa kuzoea upotevu wa maisha na riziki kiholela, wala hatari kwa amani na utulivu wetu.”

“Haki ya kukusanyika, kuandamana, kupiga kelele, kutembea bila silaha, na kuwasilisha maombi kwa mamlaka imehakikishwa na Katiba yetu, na haki hiyo haiwezi kuondolewa.”