Gachagua: Wandani wa Karibu wa Rais Ruto Wanataka Kunizuia Kusafiri Marekani

Aliyekuwa Naibu Rais na kiongozi wa chama cha Democracy for the Citizens Party (DCP), Rigathi Gachagua, amewatuhumu washirika wa karibu wa Rais William Ruto kwa kujaribu kumzuia kusafiri kwenda Marekani.

Akizungumza katika mkutano na waandishi wa habari Jumatano, Julai 9, 2025, Gachagua alidai kuwa watu wa karibu na Rais waliwapigia simu baadhi ya watu wa timu yake mapema siku hiyo, wakitoa vitisho vilivyolenga kumtisha na kumzuia kuondoka nchini.

“Nimetishwa na watu wa karibu na William Ruto waliowapigia simu baadhi ya watu wangu leo. Walisema wangenizuia kuondoka nchini,” alisema.

Licha ya vitisho hivyo, Gachagua alithibitisha kuwa bado atapanda ndege kuelekea Marekani baadaye jioni, akisema kuwa anakusudia kuzungumza na Wakenya waishio ughaibuni kuhusu hali ya taifa.

Alisema kwamba ingawa angependa kubaki nchini wakati huu mgumu kwa Wakenya, alikuwa na majukumu ya kimataifa ambayo hangeweza kuyahirisha.

“Usiku wa leo, nitasafiri kwenda Marekani kuzungumza na Wakenya waishio ughaibuni kuhusu hali ya taifa. Ningependa sana kubaki nchini wakati huu mgumu ambapo watu wetu wako katika mashaka, lakini nina majukumu ambayo siwezi kuyasogeza,” alisema Naibu Rais aliyeondolewa madarakani.

Gachagua alisisitiza msimamo wake, akiwarai waliotoa vitisho hivyo kumkabili moja kwa moja uwanja wa ndege.

“Sina shida yoyote. Kama mnataka kuja kunikamata uwanjani kama mnavyotutishia, mnaweza kuja. Hatuwezi kuogopa,” alitangaza.

“Kwa hivyo, ninaposafiri, isipokuwa nizuiwe, jambo ambalo nitalikubali kwa sababu hii ni nchi yangu, tumeweka mipango ya kutosha ya kuunda kikosi cha mawakili kwa ajili ya vijana wetu wanaoteswa.”

Safari hiyo, inayotarajiwa kudumu kwa muda wa miezi miwili, itamshuhudia Gachagua akikutana na Wakenya katika majimbo mbalimbali, ikiwemo Texas. Alisema lengo ni kuungana tena na Wakenya wa diaspora na kuwahamasisha kuwekeza tena nchini Kenya.

“Walienda huko miaka mingi iliyopita na wamefanikiwa sana kifedha, lakini sisi hapa tunahangaika. Nimeamua kuwatafuta watu hao katika maeneo kama Texas na kuwaomba warudi kutuunga mkono,” alisema wakati wa ibada ya kanisani tarehe 29 Juni 2025.