Genge la Wahuni Lavamia Sehemu ya Wajawazito ya Hospitali ya Kitengela

Genge Lavamia Sehemu ya Wajawazito ya Hospitali ya Kitengela Kulitokea hali ya taharuki Jumatatu jioni baada ya genge kuvamia Hospitali ya Kitengela na kusababisha usumbufu wa huduma.

Genge hilo lilikatiza upasuaji wa dharura wa kumtoa mtoto uliokuwa ukiendelea na kuharibu chumba cha upasuaji. Pia walichoma moto katika lango la hospitali. 

Chama cha Madaktari Bingwa wa Magonjwa ya Wanawake na Uzazi Kenya (KOGS) kililaani vikali uvamizi huo wa kushtua na usio wa kisheria wa hospitali hiyo uliofanywa na genge lenye silaha wakati wa maandamano ya Saba Saba.

“Kilicholeta wasiwasi mkubwa ni kuvurugwa kwa chumba cha upasuaji cha hospitali wakati mama alikuwa akifanyiwa operesheni ya kumtoa mtoto, tukio ambalo linapaswa kulindwa kwa kiwango cha juu kabisa cha ulinzi na heshima ya kitabibu,” alisema Rais wa KOGS, Dkt. Kireki Omanwa.

“Uvunjaji huu wa kituo muhimu cha huduma za afya, taasisi ya uponyaji na usalama, ni tendo la kizembe na lisilo la kibinadamu,” aliongeza.

Dkt. Omanwa alielezea hofu kuwa maisha ya mama na mtoto yaliwekwa katika hatari kubwa, na kwamba wafanyakazi wa hospitali walipatwa na mshtuko na kushindwa kutekeleza majukumu yao.

“Kitendo hiki ni ukiukaji mkubwa wa maadili ya kitabibu, haki za wagonjwa, na utu wa binadamu.”

Chama hicho pia kilikosoa polisi kwa kile ilichokitaja kuwa vizuizi visivyo vya haki kwa wanawake wajawazito, kina mama na watoto vilivyosababishwa na hatua kali zisizo na mashauriano zilizochukuliwa na vikosi vya usalama dhidi ya maandamano ya Saba Saba.

“Vizuizi barabarani, amri za kutotoka nje bila mpangilio, gesi ya kutoa machozi na ukandamizaji wa nguvu vimezuia uhamaji, na kufanya kuwa vigumu kwa wanawake wengi walioko katika uchungu wa kujifungua na watoto wagonjwa sana kupata huduma za afya kwa wakati,” alisema Dkt. Omanwa.

Alisema vizuizi hivyo vinakiuka Kifungu cha 43(1)(a) cha Katiba ya Kenya, ambacho kinamhakikishia kila mtu haki ya kupata kiwango cha juu kabisa cha afya, ikiwemo huduma za afya ya uzazi.

Hali ya taharuki iliendelea kutanda Kitengela na maeneo ya jirani baada ya kuripotiwa kuwa mtu mmoja alipigwa risasi na kuuawa.

Mtu huyo aliyeripotiwa kuuawa na polisi katika maandamano ya Kitengela Jumatatu ametambuliwa kuwa ni Brian Kimutai, mwenye umri wa miaka 21.

Alikuwa mhudumu wa bodaboda anayefahamika katika mji wa Kitengela. Kifo chake kilithibitishwa na muuguzi mkuu katika Hospitali ya Kitengela Level 4, ambako alikimbizwa baada ya tukio hilo.

Inaripotiwa kuwa waathiriwa wanne wamelazwa hospitalini humo wakiwa na majeraha ya risasi.

Wengine kadhaa, wakiwemo maafisa wa polisi waliopata majeraha mbalimbali wakati wa maandamano, walikuwa wakipokea matibabu katika hospitali hiyo hiyo.