Ndindi Nyoro: Sijui kwanini niliondolewa kama Mwenyekiti wa Kamati ya Bajeti

MBUNGE wa Kiharu Ndindi Nyoro anasema hajui ni kwa nini aliondolewa kama mwenyekiti wa Kamati yenye ushawishi mkubwa ya Bajeti na Matumizi.

Nyoro, anayehudumu kwa muhula wake wa pili, alitimuliwa wiki jana na nafasi yake kuchukuliwa na Mbunge wa Alego Usonga, Samuel Atandi.

Atandi ni mwanachama wa ODM. Marekebisho hayo pia yalishuhudia washirika wa aliyekuwa Naibu Rais Rigathi Gachagua kuondolewa katika nyadhifa kuu za uongozi bungeni.

Akizungumza katika kikao cha kitaifa na wanahabari kutoka afisini mwake, Jumanne, Nyoro alisema kuwa ingawa uteuzi wake ulizingatia mashauriano mapana, hakuna aliyemfahamisha kuhusu sababu za kuondolewa kwake.

"Msimamo nilioshikilia ulitokana na mashauriano. Kabla ya uamuzi kama huo kufanywa, majadiliano ya kina lazima yafanyike. Hata hivyo, sijafanya mazungumzo yoyote, moja kwa moja au kwa simu, na kiongozi yeyote katika muungano wetu kuhusu kuondolewa kwangu," Nyoro alisema.

Nyoro, ambaye alichukuliwa kuwa mshirika wa karibu wa Rais William Ruto kabla ya kuondolewa kwake, alifichua kwamba alizungumza mara ya mwisho na rais kuhusu masuala ya kisiasa mwaka jana.

"Mazungumzo ya mwisho ya kisiasa niliyokuwa nayo na rais-iwe ana kwa ana au kupitia mazungumzo-ilikuwa kabla ya Oktoba mwaka jana. Sitaki kuzungumzia haiba zaidi," alisema.

Huku akibakia kutoeleweka kuhusu hatua yake inayofuata ya kisiasa, Nyoro alitoa shukrani kwa Wakenya kwa fursa ya kuhudumu kama mwenyekiti wa Kamati ya Bajeti.  Hata hivyo, alisisitiza kuwa hana kinyongo na mtu yeyote, kwani anaamini hasira na chuki ni mzigo kwa kiongozi.

"Sijibu ubaya kwa ubaya. Sitaki kudhani najua bora wakati sijui. Pia ninaamini kuwa hasira na chuki ni mzigo mzito kwa kiongozi yeyote," alisema.

"Unabeba hisia hasi tu kwa faida ya wanaokudharau."

Nyoro alisema hataingia kwa undani kuzungumzia utendakazi wa serikali kwa sasa, akisema kazi itajisemea yenyewe, ikiwa ipo.

"Huna haja ya kurejelea kile Rais Mwai Kibaki mnamo 2007, lakini ukienda Thika Road, utaona alichofanya," alisema.