Mume wa muigizaji Regina Daniel ,Bilionea Ned Nwoko, ajibu madai ya kumuoa Chika Ike kama mke wa 7

Seneta maarufu wa Nigeria, Ned Nwoko, amekanusha madai kwamba anapanga kumuoa muigizaji wa Nollywood, Chika Ike, kama mke wake wa saba.

Uvumi huu ulienea baada ya mke wa Nwoko, muigizaji Regina Daniels, kufunga akaunti yake ya Instagram, hali iliyozidisha tetesi kwamba Nwoko amepata mtoto na Chika Ike.

Kupitia ukurasa wake wa Instagram siku ya Jumatatu, Nwoko alikanusha vikali madai haya, akiyaita ya uongo na yenye nia mbaya.

Bwenyenye huyo alisisitiza kwamba, kama kiongozi wa umma na mume wa muigizaji, si jambo geni kwa wanablogu kutunga hadithi za uongo.

Aliwahimiza waandishi wa habari kuthibitisha taarifa kabla ya kuzichapisha na akaonya dhidi ya kusambaza habari za uongo.

Chika Ike pia alijibu madai hayo, akiyaita "uongo na yasiyo na msingi."

Muigizaji huyo alisema kwamba Nwoko si baba wa mtoto wake na kwamba hana nia ya kuingia katika ndoa ya mitala.

Aliongeza kuwa, ingawa uvumi umekuwa ukienea kuhusu maisha yake kwa miaka mingi, amekuwa akiyapuuzia kwa sababu ni sehemu ya kazi yake kama mtu maarufu.

Hata hivyo, aliamua kujibu wakati huu kwa sababu uvumi huo unahusu mtoto wake ambaye hajazaliwa.

Hii si mara ya kwanza kwa Chika Ike kuhusishwa na Nwoko. Mnamo mwaka 2020, kulikuwa na ripoti kwamba mwigizaji huyo alikuwa anatarajiwa kuwa mke mpya wa mwanasiasa huyo, madai ambayo aliyakanusha haraka.

Chika Ike, ambaye ameweka maisha yake binafsi faragha, aliolewa na Tony Eberiri mwaka 2006, lakini ndoa hiyo ilivunjika mwaka 2013 kutokana na madai ya unyanyasaji wa nyumbani.

Ned Nwoko, anayewakilisha Jimbo la Delta Kaskazini katika Bunge la Kitaifa, alihamia kutoka Chama cha PDP kwenda APC hivi majuzi. Alikanusha pia kutoa matamko yoyote kuhusu mwimbaji maarufu Innocent '2Baba' Idibia na mkewe Annie Macaulay-Idibia, akisema ripoti hizo si za kweli.

Aidha, alisisitiza kuwa kwa sasa yuko kwenye majukumu ya kitaifa na hana muda wa kushughulika na masuala ya kupotosha.

Ofisi ya Seneta Nwoko ilitoa wito kwa waandishi wa habari kuthibitisha taarifa kabla ya kuzichapisha na ikakumbusha kuhusu athari za kusambaza habari za uongo.