Jeshi la Marekani Lapiga Marufuku Watu Waliobadili Jinsia Kujiunga Na Vikosi Vya Usalama

Jeshi la Marekani limechukua hatua rasmi ya kuwapiga marufuku watu waliobadili jinsia kujiunga na vikosi vya ulinzi, kufuatia agizo jipya la Rais Donald Trump.

Tangazo hili lilitolewa na Waziri wa Ulinzi, Pete Hegseth, mnamo 10 Februari 2025, likieleza kuwa hatua hiyo inalenga kuimarisha utayari wa jeshi na mshikamano wa kikosi.

Marufuku hii inawalenga watu wote waliowahi kupitia au wanaopanga kupitia mchakato wa mabadiliko ya jinsia, ikiwa ni pamoja na wale wanaopata matibabu ya homoni au upasuaji wa kubadili jinsia.

Yego seeks golden continental exit in Accra showpiece Athletics

TOUCHLINE COLUMN: Sh42.4m storm exposes fragile foundations of Kenyan football governance Football

Hatua hii ni utekelezaji wa Agizo la Rais Namba 14183, ambalo Trump alitia saini mnamo 27 Januari 2025, likielekeza Wizara ya Ulinzi kurekebisha sera zake ili kuhakikisha kuwa watu wanahudumu jeshini kwa misingi ya jinsia yao ya kuzaliwa pekee.

Agizo hilo pia linapiga marufuku matumizi ya viwakilishi vya kijinsia (pronouns) vinavyoenda kinyume na jinsia ya kuzaliwa na linaelekeza wanajeshi wote kutumia vyoo na mabweni kulingana na jinsia waliyozaliwa nayo.

Kupitia taarifa rasmi iliyotolewa kwenye mtandao wa X mnamo 14 Februari 2025, Jeshi la Marekani lilithibitisha utekelezaji wa sera hiyo mpya kwa maneno yafuatayo:

"Jeshi la Marekani halitaruhusu tena watu waliobadili jinsia kujiunga na jeshi na litasitisha mara moja utendaji au kuwezesha taratibu zozote zinazohusiana na mabadiliko ya jinsia kwa wanajeshi waliopo.

Kuanzia sasa, usajili mpya wa watu waliowahi kuwa na historia ya gender dysphoria (mabadiliko ya jinsia) umesitishwa, na taratibu zote za kitabibu—zilizopangwa, ambazo hazikupangwa, au zinazoendelea—zinazosapoti mchakato wa kubadili jinsia kwa wanajeshi, zimesitishwa.

Watu wenye mabadiliko ya jinsia waliamua kwa hiari kulitumikia taifa letu na watatendewa kwa heshima na hadhi.”

Hatua hii imeibua upinzani mkali kutoka kwa mashirika ya kutetea haki za binadamu na jumuiya za LGBTQ+.

Wakosoaji wanasema sera hiyo inakiuka misingi ya usawa na haki za binadamu, huku ikiwatenga wanajeshi walioko jeshini ambao walikuwa wakipitia mchakato wa kubadili jinsia.

“Ni sera dhalimu na inayowarudisha nyuma wanajeshi waaminifu waliotoa huduma kwa taifa lao,” alisema Sarah McBride, mkurugenzi wa HRC (Human Rights Campaign). “Jeshi la Marekani linapaswa kuwa jumuishi na lisilobagua.”

Wakati huo huo, wanasiasa wa kihafidhina na washirika wa Trump wamepongeza hatua hiyo, wakisema kuwa inalinda mshikamano wa kijeshi na kuondoa masuala ya kitamaduni yasiyoendana na maadili ya kijeshi.

Kwa sasa, kuna kesi kadhaa zinazoandaliwa mahakamani kupinga marufuku hiyo, huku wanaharakati wakiahidi kupigania haki za watu waliobadili jinsia katika jeshi.

Inasubiriwa kuona ikiwa uamuzi huu utapingwa mahakamani na hatimaye kubatilishwa au kubaki kama sera rasmi ya jeshi la Marekani.