Jamaa Aliyezua Gumzo 2023 Sweden Kwa Kuchoma Quran Auawa Kwa Risasi

MWANAMUME aliyezua maandamano baada ya kuchoma Quran ameuawa kwa kupigwa risasi nchini Uswidi, kwa mujibu wa ripoti za vyombo vya habari nchini humo kwa mujibu wa shirika la habari la BBC.

Salwan Momika, 38, anaripotiwa kuuawa katika ghorofa huko Södertälje, Stockholm, Jumatano jioni.

Machafuko yalizuka baada ya Bw Momika kuchoma moto nakala ya kitabu kitakatifu cha Kiislamu nje ya Msikiti Mkuu wa Stockholm mnamo 2023.

Polisi wa Stockholm walisema katika taarifa kwamba watu watano wamekamatwa baada ya mtu mmoja mwenye umri wa miaka 40 kupigwa risasi usiku kucha.

Vyombo vya habari vya eneo hilo viliripoti kwamba Bw Momika alikuwa akitiririsha moja kwa moja kwenye mitandao ya kijamii wakati alipopigwa risasi.

Bw Momika, raia wa Iraq anayeishi nchini Uswidi, alishtakiwa mwezi Agosti pamoja na mtu mwingine kwa kosa la "machafuko dhidi ya kabila" mara nne katika majira ya joto ya 2023.

Hukumu hiyo, iliyopaswa kutolewa siku ya Alhamisi, iliahirishwa baada ya "kuthibitishwa kuwa mmoja wa washtakiwa amefariki", Mahakama ya Wilaya ya Stockholm ilisema.

Bw Momika aliendesha msururu wa maandamano dhidi ya Uislamu, na hivyo kuzua hasira katika nchi nyingi zenye Waislamu wengi.

Machafuko yalitokea katika ubalozi wa Uswidi huko Baghdad mara mbili, wakati balozi wa Uswidi alifukuzwa kutoka mji huo huku kukiwa na mzozo wa kidiplomasia.

Polisi wa Uswidi walikuwa wamempa Bw Momika idhini ya kufanya maandamano ambapo aliteketeza kitabu hicho kitakatifu, kwa mujibu wa sheria za nchi hiyo za uhuru wa kujieleza.

Serikali baadaye iliahidi kuchunguza njia za kisheria za kukomesha maandamano ambayo yanahusisha kuchoma maandishi katika hali fulani.