Equatorial Guinea yaanzisha msako mkali dhidi ya tuhuma za ngono kwenye ofisi za serikali

Taifa la Equatorial Guinea Jumanne liliamuru kupigwa marufuku ngono katika ofisi za serikali baada ya video za kibinafsi kuvuja kwenye mitandao ya kijamii zikionyesha afisa mkuu wa wizara ya fedha akifanya mapenzi na wanawake kadhaa katika maeneo mbalimbali, ikiwa ni pamoja na ofisi yake.

Kwa mujibu wa shirika la habari la Reuters, Serikali ilisema inachukua hatua kwa sababu video hizo zimedhalilisha sura ya nchi hiyo ndogo ya Afrika ya Kati. Equatorial Guinea imekuwa ikitawaliwa na rais huyo kwa miongo kadhaa na kashfa hiyo imekuwa ikiitikisa serikali tangu video hizo zilipoibuka kwa mara ya kwanza wiki iliyopita.

Ripoti za vyombo vya habari za eneo hilo zilisema mamia ya video za ngono zilipatikana katika nyumba ya afisa huyo wa fedha wakati wa msako unaohusishwa na uchunguzi wa ufisadi.

Wanawake walioangaziwa kwenye video hizo walionekana kujumuisha wake za watu wengine wenye nguvu serikalini na wanafamilia wengine, vyombo vya habari vya ndani vilisema.

Reuters haikuweza kuthibitisha uhalisi wa video hizo.

Mnamo Jumanne, Makamu wa Rais Nguema Obiang Mangue aliamuru hatua mpya za kuzuia maafisa wa mahakama na wizara kujihusisha na vitendo haramu kazini, taarifa ya serikali ilisema.

Hizi ni pamoja na kufunga kamera za usalama katika ofisi zote pamoja na ulinzi ulioimarishwa.

"Mtendaji mkuu anachukua uamuzi huu kufuatia video za ngono ambazo zimeenea kwenye mitandao ya kijamii katika siku za hivi karibuni na ambazo zinadhalilisha sura ya nchi," shirika la habari la serikali lilisema katika taarifa hiyo.

Taarifa hiyo ilisema hatua hizo zilikubaliwa wakati wa mikutano ya dharura na Mahakama ya Juu, mwanasheria mkuu na wengine. Ilisema watakaoonekana kwenye kanda hizo za ngono watasimamishwa kazi bila kutaja majina, huku waliohusika kulinda majengo yanayodaiwa kurekodiwa video hizo watakemewa kwa kushindwa kufanya kazi zao.

Rais Teodoro Obiang ameiongoza Equatorial Guinea, taifa lenye takriban watu milioni 1.7 kwenye pwani ya magharibi ya Afrika ya Kati kwa miaka 45 na ndiye rais aliyekaa muda mrefu zaidi duniani.