Hakuna kuvaa wigi tafadhali! - sheria mpya zinazua tumbojoto kwa mashindano ya urembo

Mawigi marefu, yanayotiririka na vipanuzi vya kusuka vimetawala sehemu kubwa za mashindano ya urembo maarufu nchini Ivory Coast kwa miaka mingi.

Washiriki wa shindano katika taifa hilo la Afrika Magharibi mara nyingi hutumia kiasi kikubwa cha pesa kwa mwonekano wao, kuanzia mavazi hadi urembo wa nywele - huku wachache wakichagua mwonekano wa asili.

Katika zaidi ya miongo sita, kumekuwa na visa viwili pekee vinavyojulikana, wa hivi karibuni zaidi alikuwa Marlène-Kany Kouassi, ambaye alitwaa taji la Miss Ivory Coast mwaka 2022 - akionekana kung'ara kwa nywele zake fupi za asili, taji likiwa pambo lake pekee.

Ushindi wake haukuwa wa kawaida tu nchini Ivory Coast lakini kote ulimwenguni, ambapo viwango vya urembo vya Magharibi mara nyingi ndio sura inayotarajiwa kwa wale wanaoingia kwenye mashindano na kwa majaji.

Mabadiliko yanaongezeka polepole - Desemba iliyopita Angélique Angarni-Filopon, kutoka kisiwa cha Karibean cha Ufaransa cha Martinique, aligonga vichwa vya habari alipotawazwa kuwa Miss France, hasa kwa sababu ya umri wake - ana umri wa miaka 34 - na pia alikuwa na nywele fupi za Afro.

Lakini mwaka huu waandaji wa shindano la Ivory Coast wanatikisa mambo tangu mwanzo.

Wigi, na nywele za kurefusha nywele zimepigwa marufuku katika hatua za awali za mashindano hayo yanayofanyika katika miji 13 kote nchini (pamoja na mawili ya nje ya nchi kwa wale walioko ughaibuni).

"Tunataka wagombeaji wawe wa asili - iwe na kusuka au nywele zilizonyooka, ziwe zao wenyewe. Urembo lazima uwe mbichi," Victor Yapobi, rais wa kamati andalizi ya Miss Ivory Coast, aliambia BBC.

Ivory Coast ndio nchi pekee barani Afrika inayotekeleza marufuku ya mashindano ya kitaifa.

Bw Yapobi alisema waandaaji nchini Ivory Coast kwa muda mrefu wamekuwa wakijaribu kukuza mwonekano wa asili zaidi - kwa mfano upasuaji wa urembo ni wa hapana na kung'aa kwa ngozi kumepuuzwa.

"Tuliamua mwaka huu kuonyesha uzuri wa asili wa wasichana hawa," alisema.

Mabadiliko mengine pia yametekelezwa, kama vile kuruhusu wanawake wafupi kidogo kushindana - kima cha chini cha urefu sasa ni 1.67m (futi 5.4), kuongeza umri kwa miaka mitatu hadi 28 na - muhimu sana - kupunguza ada ya kiingilio kwa zaidi ya $30 (£25) hadi $50.