Mtangazaji Smriti Vidyarthi Aiaga NTV Baada ya Miaka 16

Mtangazaji maarufu wa televisheni, Smriti Vidyarthi, ameondoka katika Shirika la Habari la Nation Media Group baada ya kuhudumu kwa miaka 16 na nusu kwenye vipindi vya habari vya NTV.

Katika kipindi chake NTV, Smriti alikuwa mtangazaji wa vipindi maarufu kama NTV Weekend Edition, NTV Tonight, na NTV Wild Talk.

Kupitia chapisho kwenye X, alitangaza kuwa taarifa ya habari ya Jumatatu saa tatu usiku ingekuwa ya mwisho kwake.

Hata hivyo, hakufichua ikiwa anaondoka kwa ajili ya kustaafu au anaanza safari mpya kwingineko.

"Miaka 16 na nusu ya kuhudumia Nation Media Group na taifa kwa ujumla. Asanteni kwa kuniamini. Kwa sasa, jiunge nami usiku wa leo saa tatu kwa taarifa yangu ya mwisho kwenye NTV," aliandika.

Kuondoka kwake kunajiri wakati sekta ya vyombo vya habari inashuhudia mabadiliko makubwa, huku wanahabari mashuhuri wakihama kutoka shirika moja hadi jingine.

Miongoni mwao ni mtangazaji maarufu wa redio na televisheni waliobadilisha mashirika, Eric Latiff, ambaye hivi karibuni alijiunga na Nation Media Group baada ya kuondoka Standard Media Group.

Latiff alitangaza kuondoka kwake kutoka kituo cha Spice FM, ambako alikuwa amehudumu kwa miaka minne na nusu, kabla ya kuhamia NMG.

Pia, mwandishi wa habari Janet Mbugua alirejea kwenye runinga baada ya mapumziko ya miaka minane, akijiunga tena na NTV.

Mkuu wa Idara ya Utangazaji wa Nation Media Group, Simaloi Dajom, alithibitisha kurejea kwake na kumsifu kwa uwezo wake wa kuwahusisha watazamaji.

Mtangazaji mkongwe Ken Mijungu naye alitangaza kuondoka KTN baada ya kuhudumu kwa miaka minne na kujiunga na Cape Media Limited katika kituo cha TV47.

Smriti alianza taaluma yake katika K24 mnamo Januari 2008 kama mtangazaji wa habari kabla ya kujiunga na NTV mnamo Septemba mwaka huo huo.

Katika NTV, aliendesha vipindi muhimu vya habari na kuwa mtangazaji wa NTV This Morning pamoja na NTV Wild Talk, kipindi kinacholenga kuongeza uelewa kuhusu uhifadhi wa wanyamapori na mazingira.

Mchango wake katika tasnia ya uandishi wa habari umetambuliwa kwa kiwango kikubwa. Mnamo 2013, alitunukiwa Tuzo ya Ubora wa Uandishi wa Habari ya Baraza la Vyombo vya Habari katika kipengele cha Habari za Televisheni na Taarifa za Habari, kuthamini mchango wake mkubwa katika sekta hiyo.