Francis Gaitho avunja kimya baada ya DCI kutangaza msako dhidi yake

Mshawishi maarufu kwenye mitandao ya kijamii Francis Gaitho amejibu baada ya Kurugenzi ya Upelelezi wa Jinai (DCI) kutangaza msako dhidi yake. 

Siku ya Alhamisi adhuhuri, DCI ilitangaza kwamba mwanablogu huyo anasakwa kutokana na matendo mbalimbali ya uhalifu ambayo yanadaiwa kufanywa kwenye mitandao ya kijamii.

“Mtuhumiwa alikuwa ameshtakiwa kwa kosa la kuchapisha taarifa za uongo kinyume na Kifungu cha 23 cha Sheria ya Makosa ya Kompyuta na Makosa ya Mtandao (Kesi Na. CR E738/24). Alisusia kikao cha mahakama mnamo Desemba 4, 2024, ambacho kilisababisha kutolewa kwa Hati ya Kukamatwa Kwake na Mahakama ya Sheria ya Milimani. Pia anachunguzwa kwa kushiriki taarifa za kibinafsi za Afisa Mkuu wa Umma na Kuchapisha Taarifa za Uongo Kinyume na Kifungu cha 23 cha Sheria ya Matumizi Mabaya ya Kompyuta na Uhalifu wa Mtandao dhidi ya raia wengine wa Kenya,” DCI ilisema kwenye taarifa.

Waliongeza, "Aidha, mshukiwa atakabiliwa na makosa mengi ya unyanyasaji wa mtandao kwa matendo ambapo aliwadharau maafisa wakuu wa serikali. Faili zilizo hapo juu zinasubiri kuchunguzwa na ushauri na Ofisi ya Mkurugenzi wa Mashtaka. Iwapo una taarifa zozote zinazoweza kusababisha kukamatwa kwa mshukiwa mara moja, tafadhali piga simu yetu ya simu bila malipo kwa nambari 0800 722 203 bila kujulikana jina lako au uripoti kituo cha polisi kilicho karibu nawe.”

Katika majibu yake, Gaitho alisema kuwa atajiwasilisha kwa makao makuu ya DCI Jumatatu akiandamana na mawakili wake.

Pia alitupilia mbali uhusiano wowote na shughuli za uhalifu akibainisha uhuru wake wa kujieleza.

“Mimi si mhalifu. Mimi si muuaji. Mimi si mkosaji mkuu. Nimetweet tu. Uhuru wa kusema ni haki ya kikatiba na ninautumia kadri ya uwezo wangu. Wahalifu wengine wanatembea huku wakiwa huru lakini yangu ni mateso ya kisiasa kwa sababu nyingi za kesi hizi zina masuluhisho ya kiraia,” Gaitho alisema.

Pia aliwashukuru Wakenya waliomfikia kufuatia tangazo la DCI.