Rais Ruto aahidi kusitisha visa vya utekaji nyara

Rais William Ruto amewaahidi wakenya kuwa serikali itakomesha visa vinavyoongezeka vya utekaji nyara nchini.

Alitangaza kuwa serikali imejitolea kuhakikisha usalama wa Wakenya wote, haswa vijana.

Hata hivyo, aliwataka vijana wawe na adabu na nidhamu. "Maneno ya utekaji tutakomesha ndiyo vijana wa Kenya waweze kuishi kwa amani na vile vile wawe na nidhamu na ungwana," alisema.

Msururu wa utekaji nyara ambao umewalenga vijana wa Kenya katika miaka ya hivi majuzi umesababisha hasira ya kitaifa na kuongezeka ukosoaji wa mashirika ya uchunguzi kwa ulegevu.

Familia za ndugu waliopotea zimetakiwa kuripoti ili kusaidia uchunguzi, lakini polisi wamekanusha kuhusika kwa lolote.

Wakenya wengi wamehusisha visa hivyo na machapisho ya kukera kwenye mitandao ya kijamii. Ruto aliwataka wazazi kutekeleza wajibu na kuhakikisha wanawapa watoto wao aina sahihi ya usaidizi na mwelekeo.

Alisisitiza umuhimu wa kusitawisha kanuni za maadili kwa watoto. Rais alitangaza kuwa serikali itaendelea na juhudi zake za kuwaweka salama.

Ruto alisema hayo katika Kaunti ya Homa Bay kwenye michuano ya kuwania taji la Ugavana wa Genowa, iliyoandaliwa kwenye uga wa Raila Odinga Jumamisi.

Baadhi ya viongozi walihudhuria hafla hiyo, akiwemo Katibu Mkuu wa Mambo ya Ndani Raymond Omollo, Gavana wa Homa Bay Gladys Wanga, na Raila Odinga.

Kulingana na ripoti iliyotolewa Alhamisi na Tume ya Kitaifa ya Haki za Kibinadamu ya Kenya, watu 82 wametekwa nyara tangu Juni mwaka huu, na 29 kati yao bado hawajapatikana.

Tume hiyo ilieleza kuwa kesi 13 ziliripotiwa katika kipindi cha miezi mitatu iliyopita, huku saba kati ya hizo zikitokea mwezi Desemba pekee.

Hata hivyo, KNCHR iliripoti kuwa ni mtu mmoja tu kati ya saba walioripotiwa mwezi huu ndiye aliyepatikana.

Watu sita waliopotea kwenye orodha hiyo wanadaiwa kutekwa nyara kati ya Desemba 17 na Desemba 25. Wao ni Rony Kiplang'at (Kiambu), Gideon Kibet, anayejulikana pia kama Kibet Bull (Nairobi), Billy Mwangi (Embu), Peter Muteti (Nairobi), Bernard Kavuli (Nairobi), na Steve Mbisi kutoka Machakos.

Mwenyekiti wa tume hiyo Roselyne Odede aliweka lawama kwa Huduma ya Kitaifa ya Polisi akidai wanasimamia kuhakikisha kila Mkenya yuko salama.

"Tunataka kuwakumbusha NPS wajibu wake wa kuwalinda Wakenya kutokana na uhalifu huu wa kikatili, hasa kwa vile utekaji nyara huu unatokea mchana na baadhi yao wamenaswa kwenye CCTV, lakini hakuna aliyekamatwa bado," alisema.

Tangu wakati huo, madai yoyote ya kuhusika kwa polisi katika utekaji nyara usioelezeka yamekanushwa na Inspekta Jenerali Douglas Kanja.

Kanja alisema katika taarifa yake Alhamisi kuwa hakuna hata mmoja wa watu walioripotiwa kutekwa ambaye anashikiliwa na kituo chochote cha polisi nchini.

"Ili kuepusha shaka, Huduma ya Kitaifa ya Polisi haihusiki na utekaji nyara wowote, na hakuna kituo cha polisi nchini ambacho kinawashikilia watu walioripotiwa kutekwa," alisema.

Mamlaka Huru ya Kusimamia Polisi (IPOA) ilikuwa ikichunguza madai ya kuhusika kwa afisa wa polisi, IG aliongeza.

Issack Hassan, mwenyekiti wa Ipoa, alisema kuwa timu za mashirika mengi ya wachunguzi zilitumwa Nairobi, Kajiado, na Embu, maeneo ambayo utekaji nyara uliripotiwa.

Matukio machache kati ya hayo yalinaswa na kamera wakati wa mchana. Wakati huo huo, Inspekta Jenerali alimtaka yeyote aliye na taarifa za kutoweka kufika katika kituo cha polisi kilicho karibu zaidi.

"Mamlaka Huru ya Kusimamia Polisi na chombo kingine chochote huru kinaweza kuchunguza suala hilo.

"Yeyote ambaye ana taarifa muhimu kuhusu mtu aliyepotea anahimizwa kuripoti katika kituo cha polisi kilicho karibu zaidi," alisema.