Klabu ya Brazil, Palmeiras imemfungia Neymar milango ya kurejea kisa majeraha ya mara kwa mara

Rais wa Palmeiras Leila Pereira aliweka wazi kuwa Neymar hatarejea katika soka la Brazil na klabu yake.

Katika mahojiano ya hivi majuzi na UOL, Pereira alikiri ubora wa fowadi huyo lakini akasisitiza kwamba masuala ya kimwili yanayoendelea ya mchezaji huyo hayatamruhusu kuwekwa kwenye mipango ya timu.

"Mchezaji mzuri, lakini anaenda Santos. Sijui, unapaswa kuuliza Santos, lakini sio hapa, hawezi kuja," Pereira alisema kwa uthabiti.

Uongozi wa klabu hiyo, ambayo kwa sasa iko katika nafasi ya pili kwenye Brasileirao, walitoa maoni ya wazi kuhusu vipaumbele vyao linapokuja suala la usajili.

"Nataka kuwekeza kwa mtu ambaye anaweza kuingia mara moja, mtu ambaye anaweza kucheza kesho ikiwa kocha ataamua hivyo. Palmeiras sio idara ya matibabu. Sitakubali kusajili mchezaji ambaye hawezi kucheza mara moja," Pereira alisema akirejelea kwa hila historia ya jeraha la Neymar kama sababu kuu ya kukataliwa kwake

Nyota huyo wa Brazil, ambaye kwa sasa anakipiga katika klabu ya Al-Hilal ya Saudi Arabia, amekuwa na kibarua kigumu mwaka 2024.

Baada ya kupona kutokana na ACL iliyochanika na kumuweka nje ya uwanja kwa zaidi ya mwaka mmoja, tatizo la paja limemrudisha pembeni.

Kulingana na Transfermarkt, Neymar amekuwa nje kwa siku 41 na amecheza mechi mbili pekee msimu huu, akiingia uwanjani kwa dakika 42 pekee.

Ingawa uvumi kuhusu uwezekano wa kurejea kwa Neymar kwenye soka la Brazil umeongezeka, msimamo wa Pereira unaonyesha kuwa si timu zote ziko tayari kuhatarisha kumsajili.

Huku Santos kama mahali panapowezekana, mustakabali wa mshambuliaji huyo bado haujulikani, haswa anapoendelea kupambana na matatizo yake ya kimwili na kuthibitisha kuwa bado anaweza kung'ara katika kiwango cha juu zaidi cha soka.