Vinicius Jr akejeliwa kukosa kufunga mkwaju wa Penalti na rebounce ‘kama alivyokosa Ballon d’Or’

Vinicius Júnior alikosa mkwaju wa penalti kipindi cha pili Brazil ilipotoka sare ya 1-1 na Venezuela siku ya Alhamisi, na kumwacha nyota huyo wa Real Madrid akiwa bado hana bao katika mechi ya kufuzu kwa Kombe la Dunia.

Vinicius Júnior alipata nafasi ya kufunga bao la ushindi baada ya kupata mkwaju wa penalti dakika ya 67 lakini mkwaju wake wa chinichini ukaokolewa na kipa Rafael Romo na fowadi huyo wa Brazil kisha akapiga shuti nje ya uwanja.

Brazil walipata nafasi nzuri zaidi katika kipindi cha kwanza, Vinicius aligonga nguzo mara moja baada ya kuwapiga chenga Wavenezuela watatu na kupiga shuti kutoka kwenye eneo la hatari.

Lakini alikuwa Raphinha aliyetangulia kufunga kwa mpira wa adhabu katika dakika ya 43.

Venezuela ilimleta Telasco Segovia mwenye umri wa miaka 21 wakati wa mapumziko na badala yake alisawazisha dakika ya 46 kwa shuti kali kutoka pembeni mwa eneo la hatari.

Venezuela ilishuka hadi wachezaji 10 katika dakika ya 89 baada ya Alexander Gonzalez kutolewa nje kwa kadi nyekundu kwa kuwagonga usoni Gabriel Martinelli na Vinicius Júnior.

Mfumo wa umwagiliaji ulianza kutumika dakika mbili kabla ya kipenga cha mwisho kwenye Uwanja wa Monumental katika jiji la Maturin, kilomita 500 (maili 310) magharibi mwa mji mkuu Caracas, jambo ambalo liliwakera wachezaji wa Brazil.

Sare hiyo inaiweka Brazil kwa muda katika nafasi ya tatu kwenye msimamo wa timu 10 ikiwa na pointi 17 katika michezo 11.

Vinicius Júnior amecheza mechi sita katika kufuzu kwa Kombe la Dunia la Amerika Kusini, akiwa na asisti moja na hana bao.

"Tusiposhinda naondoka uwanjani nikiwa nimekata tamaa, tulistahili kushinda hii," Raphinha alisema baada ya mechi.

"Lakini ni hatua muhimu kucheza ugenini, tunajitahidi kushinda inayofuata nyumbani."

Brazil itamenyana na Uruguay mjini Salvador siku ya Jumanne, wakati Venezuela itacheza na Chile.