Tajiri mmiliki wa klabu ya soka ya Uturuki aliyempiga ngumi refa ahukumiwa miaka 3½ jela

Mahakama ya Uturuki imemhukumu mtendaji wa zamani wa klabu ya soka ya daraja la juu kifungo cha zaidi ya miaka mitatu na nusu jela siku ya Jumatatu kwa kosa la kumshambulia mwamuzi uwanjani mwishoni mwa mchezo wa ligi msimu uliopita.

Rais wa zamani wa Ankaragucu, Faruk Koca alimpiga mwamuzi Halil Umut Meler ngumi usoni baada ya firimbi ya mwisho ya sare ya 1-1 katika mchezo wa Super Lig dhidi ya Caykur Rizespor mwaka jana.

Meler, ambaye alianguka chini, pia alipigwa teke katika vurugu iliyotokea wakati mashabiki pia walipovamia uwanja baada ya Rizespor kufunga bao la kusawazisha dakika ya mwisho mnamo Desemba 11, 2023.

Tukio hilo lilikuwa limezua ghadhabu duniani na kulifanya Shirikisho la Soka la Uturuki kusimamisha michezo yote ya ligi kwa wiki kadhaa.

Mahakama mjini Ankara ilimtia hatiani Koca kwa "kumjeruhi kwa kukusudia afisa wa umma" na kumhukumu kifungo cha miaka mitatu na miezi saba jela, Shirika la serikali la Anadolu liliripoti.

Mahakama hiyo pia ilimtia hatiani Koca kwa kosa la kumtishia mwamuzi na kukiuka sheria zinazolenga kuzuia vurugu michezoni lakini ikamsimamisha adhabu hiyo.

Watu wengine watatu ambao pia walikuwa kwenye kesi ya kumshambulia mwamuzi, walihukumiwa vifungo vya kuanzia mwaka mmoja hadi mitano, shirika hilo liliripoti.

Koca, ambaye alijiuzulu kama rais wa klabu mara baada ya tukio hilo, anatarajiwa kukata rufaa dhidi ya uamuzi huo. Alifungwa kwa muda mfupi mwaka jana kabla ya kuachiliwa kwa dhamana.

Hapo awali, mawakili wanaowawakilisha washtakiwa waliomba kuachiliwa kwao, wakidai kuwa walifanya uhalifu huo chini ya "chokozi zisizo za haki," Anadolu aliripoti.

Ankaragucu ilipigwa faini ya milioni 2 Lira ya Uturuki ($59,000) na kulazimishwa kucheza mechi tano za nyumbani bila mashabiki.Mwamuzi huyo alilazwa kwa muda mfupi hospitalini akiwa na jeraha ndogo karibu na jicho lake.