Afisa wa Polisi Apatikana Amefariki Ndani ya Mtaro Lucky Summer, Nairobi

Maafisa wa upelelezi wanachunguza tukio ambapo mwili wa afisa wa polisi ulipatikana ndani ya mtaro karibu na uzio wa kituo cha polisi cha Lucky Summer, Nairobi.

Mwili wa Konstebo Benjamin Bore, ambaye alikuwa kituo cha polisi cha Kariobangi North, ulipatikana ndani ya mtaro wa maji machafu ukiwa na kichwa kikiwa kimechubuka.

Afisa huyo alikuwa mkazi wa nyumba za polisi za Lucky Summer. Alipatikana akiwa amefariki katika mtaro huo Jumapili jioni na jirani mmoja.

Chanzo cha kifo bado hakijabainika, kulingana na polisi waliokuwepo kwenye eneo la tukio.Polisi walisema marehemu alikuwa anatokwa na damu mdomoni.

Mwili ulipelekwa katika chumba cha kuhifadhia maiti kusubiri upasuaji na uchunguzi.

Kikosi cha maafisa wa upelelezi kilitembelea eneo ambapo mwili ulipatikana kama sehemu ya uchunguzi wa tukio hilo.

Katika eneo la Ringa, kaunti ya Homa Bay, polisi wanachunguza kisa cha mauaji baada ya mwanamume kupatikana amefariki kando ya barabara.

Mwanamume huyo alikutwa akiwa amefariki Jumamosi usiku baada ya kushambuliwa na mtu asiyejulikana.

Polisi walisema lengo la shambulio bado halijabainika.

Mwili huo ulikuwa unatoka damu sikioni upande wa kushoto wakati ulipopatikana, kabla ya kupelekwa katika chumba cha kuhifadhia maiti kusubiri upasuaji.

Katika mtaa wa Eldoret, afisa wa polisi alishambuliwa na kujeruhiwa vibaya wakati wa tukio la ujambazi katika eneo la Jerusalem, kijiji kidogo cha Sigot katika eneo la Chepkoilel.

Afisa huyo, ambaye ni wa kituo cha polisi cha Eldoret Central, alipata jeraha kubwa kichwani na aliporwa simu ya mkononi, Shilingi 200 na vitu vingine vya binafsi.

Alisema alikuwa anatoka kazini na alikuwa njiani kurejea nyumbani alipovamiwa Jumamosi usiku.

Alilazwa katika hospitali ya karibu akiwa katika hali thabiti huku polisi wakiendeleza uchunguzi kuhusu tukio hilo.

Katika eneo la Langas, Eldoret, bastola yenye risasi 15 ilipatikana ndani ya gunia lililokuwa limejaa taka. Gunia hilo lilitupwa na kundi la watoto wa mitaani waliokimbia kwa miguu.

Polisi walisema walipokagua gunia hilo walikuta bastola aina ya Ceska ikiwa na risasi 15.