Babu Owino awahimiza Gen Z na Millennials kugombea nafasi za uongozi 2027

Mbunge wa Embakasi Mashariki, Babu Owino, amewahimiza vijana—hasa kizazi cha Gen Z na millennials—kujitoa na kuwania nyadhifa za kisiasa katika uchaguzi mkuu wa mwaka 2027, akisema kwamba kupiga kura pekee hakutoshi kuleta mabadiliko ya kweli nchini.

Akizungumza Aprili 19 katika kanisa la NPN The Legacy lililoko Westlands, Nairobi, Babu alisisitiza kuwa licha ya umuhimu wa kupiga kura, mabadiliko halisi hutokea pale mtu anapochukua jukumu la kuongoza. Alieleza kuwa wanasiasa wengi huacha uongozi na kugeuka kuwa "wafanya biashara" wanaoharibu maendeleo ya taifa.

“Kila anayepiga kura tayari ni mwanasiasa kwa sababu anashiriki katika mchakato wa kisiasa. Swali la msingi ni: ni aina gani ya viongozi tunawachagua? Wapo wenye maono ya kuinua maisha ya watu, lakini wapo pia wanaoingia na nia ya kuangamiza,” alisema Babu.

Mbunge huyo alifafanua kuwa tofauti kati ya uongozi wa kujenga na ule wa kubomoa hutegemea tabia na nia ya wale wanaochaguliwa. Kwa hivyo, kuchagua viongozi wenye dhamira safi ni hatua muhimu katika mageuzi ya kitaifa.

Babu aliongeza kuwa Gen Z na millennials wanaunda asilimia 65 hadi 70 ya Wakenya, na hivyo kuwa kundi lenye ushawishi mkubwa wa kura na uwezo wa kutoa viongozi katika ngazi zote—ikiwemo urais.

“Ninawatia moyo vijana hawa wajitokeze zaidi ya kupiga kura mwaka wa 2027. Jitokezeni kugombea viti—iwe ni MCA, Mbunge, Gavana au Rais. Kama hualikwi mezani, vunja hiyo meza na uunde yako mwenyewe,” alisema kwa msisitizo.

Mbunge huyo wa ODM ambaye licha ya kuhudumu kwa muhula wa pili bado ni miongoni mwa wabunge wenye umri mdogo  zaidi bungeni, amekuwa akihimiza kwa muda mrefu ushiriki wa vijana katika siasa na uongozi wa taifa.

Kauli zake zinajiri kufuatia maandamano ya mwaka jana yaliyoongozwa na Gen Z, ambayo yalimsukuma Rais William Ruto kuondoa Muswada tata wa Fedha wa mwaka 2024, licha ya kupitishwa na Bunge la Kitaifa.