Huzuni huku Wakenya 3 wakifariki katika moto mkali jijini Sharjah, Uarabuni

Tukio la moto lililotokea siku ya Jumapili katika mji wa Sharjah, Falme za Umoja wa Kiarabu (UAE), lilisababisha vifo vya watu watano, wakiwemo Wakenya watatu.

Vifo hivi vimetangazwa rasmi na mamlaka za Kenya na UAE.

Katibu Mkuu wa Idara ya Masuala ya Diaspora, Roseline Njogu, alitoa pole kwa familia za Wakenya waliopoteza maisha.

"Nasikitika kutoa habari kuwa Wakenya watatu ni miongoni mwa waathirika watano waliopoteza maisha kutokana na moto mkali uliofanyika Sharjah, UAE. Pole za dhati kwa familia za waliopoteza wapendwa wao. Tuko pamoja nanyi katika kipindi hiki kigumu," alisema Njogu siku ya Jumatatu.

Hata hivyo, Njogu hakutoa maelezo zaidi kuhusu tukio hilo.

Polisi katika eneo la Sharjah walithibitisha kuwa timu ya maabara ya uhalifu inafanya uchunguzi ili kubaini chanzo cha moto, ambao ulianzia kwenye ghorofa ya juu ya jumba la makazi lenye ghorofa 52. Timu maalum ziko kwenye eneo la tukio kufuatilia hali hiyo.

Moto huo pia ulisababisha majeraha kwa watu 19, huku baadhi yao wakikimbilia kwenye maeneo ya usalama.

Kwa mujibu wa Gulf News, watu watano waliokufa kutokana na moto huo ni wa asili ya Kiafrika, na watatu kati yao ni Wakenya. Wote walifariki wakiwa wanajaribu kutoroka kutoka kwenye jumba hilo.

Mamlaka za UAE pia zilithibitisha kuwa watu 148 walifanikiwa kuokolewa na timu za dharura kutoka kwenye jumba hilo. Moto huo inakadiriwa kuwa ulianzia kwenye ghorofa ya 42, ambayo bado imefungwa kwa uchunguzi wa kina.