Hatutishwi na historia ya Real Madrid, hatuwaogopi! - Arteta azungumzia presha ya Bernabéu

Kocha wa Arsenal, Mikel Arteta, amesema kikosi chake hakitatishwa na hofu ya kukutana na Real Madrid katika uwanja wa Santiago Bernabéu licha ya klabu hiyo ya Uhispania kuwa na historia ya kurejea kwa njia ya kusisimua kwenye Ligi ya Mabingwa.

Akizungumza kabla ya mechi ya marudiano ya robo fainali, Arteta alikiri kuwa “remontada” (kurejea) ni sehemu ya hadithi ya Madrid lakini akasisitiza kuwa Arsenal ipo makini, imetulia, na ina malengo makubwa. “La, sitatumia neno hilo [hofu],” alisema Arteta.

“Tunaiheshimu Madrid, tunavutiwa nayo, lakini pia inatupatia motisha — si kitu cha kuogopa.”

Arsenal wanaingia kwenye mechi hiyo wakiwa na uongozi wa mabao 3-0 walioupata katika mechi ya kwanza Emirates.

Hata hivyo, wengi wanaamini Madrid bado wana nafasi ya kugeuza matokeo hayo. Arteta hajali kelele hizo. “Ikiwa ningechagua hali yoyote ya kucheza, ningechagua hii,” alisema kwa kujiamini.

Katika kipindi cha wiki moja, neno ‘remontada’ limekuwa likirudiwa mara kwa mara, hata kiungo Jude Bellingham wa Madrid akakiri kuwa hali ya mzunguko wa mechi hiyo ni “ajabu.”

Watu wengi wanaamini Madrid watapita, licha ya kuwa nyuma. Arteta anaelewa mazingira hayo lakini anawataka wachezaji wake wakae kimya na kudhibiti hisia.

“Ni sehemu ya historia yao na wana haki ya kuiamini. Lakini sisi tunapaswa kuwa na mtazamo tofauti,” alisema.

“Tumejaribu kuwapa wachezaji ujumbe wa kueleweka, na kuwakaribia zaidi katika saa 72 zilizopita. Tunatumaini ujumbe wetu utakuwa na nguvu zaidi kuliko kelele zote.”

Ben White na Thomas Partey wanapatikana kwa kujumuishwa kwa kikosi huku Jorginho akikosa safari hiyo kutokana na sababu za usafiri.

Ingawa wanaongoza kwa mabao matatu, Arteta amesema hawatacheza kwa kujilinda. “Tunataka kushinda tena. Hatutaki kulinda — tunataka kutawala. Hivyo ndivyo tunavyohisi kuwa na ujasiri zaidi.”

Alisisitiza umuhimu wa kudhibiti hisia, maandalizi na imani. “Tumepita mechi 79 bila kuruhusu zaidi ya mabao mawili. Hiyo inanipa imani kuwa tuko tayari. Lakini cha muhimu ni kile tutakachoonyesha kesho uwanjani — na ndio tunalenga.”