Shilingi milioni 350 zazama baada ya kubomolewa kwa jumba la ghorofa 11 Mombasa

Wamiliki wa jengo refu lililokuwa Mombasa wamepata hasara kubwa baada ya mradi wao wa ghorofa 11 kubomolewa kutokana na matatizo ya kiusalama—hasara hiyo inakadiriwa kuwa takriban Shilingi milioni 350, bila kufidiwa na bima yoyote.

Licha ya hasara hiyo ya kifedha, aliyekuwa Mbunge wa Embakasi Kusini, Irshad Sumra, ambaye alizungumza kwa niaba ya wamiliki hao, alisema wanamshukuru Mungu kwamba hakuna maisha yaliyopotea wakati wa ubomoaji uliofanywa chini ya usimamizi wa Kikosi cha Ulinzi cha Kenya (KDF).

“Ni kati ya Shilingi milioni 300 hadi 350—hakuna bima hata kidogo. Lakini tunapaswa kushukuru; majengo mengine yakiporomoka huwa tunatoa miili. Safari hii, hakuna maisha yaliyopotea,” alisema Sumra mara baada ya jengo hilo kubomolewa rasmi siku ya Jumatano mchana kwa kutumia mabomu.

Jengo hilo lililojengwa karibu na Barabara ya Abdel Nasser lilibomolewa baada ya wataalamu kubaini kuwa msingi wake ulikuwa dhaifu kutokana na uchimbaji wa kisima bila idhini rasmi.

Gavana wa Mombasa, Abdulswamad Nassir, alisema kuwa nguzo za sakafu ya chini ya jengo hilo tayari zilikuwa zimezama kwa takriban mita tatu, na hivyo kuwa hatari kwa watu waliokuwa karibu.

Uamuzi wa kulibomoa ulifikiwa baada ya tathmini ya pamoja kutoka kwa wataalamu wa taasisi mbalimbali zikiwemo Idara ya Ardhi na Mipango ya Miji ya Kaunti, Ukaguzi wa Majengo wa Kitaifa, Idara ya Ujenzi wa Umma, Mamlaka ya Kitaifa ya Ujenzi, timu ya usalama ya kaunti, na KDF.

Sumra alitetea wamiliki wa jengo hilo akisema walifuata taratibu zote za ujenzi na hata walizidisha ubora uliohitajika katika baadhi ya maeneo.

“Kwa mfano, tuliambiwa tuitumie zege ya 600mm, sisi tuliweka 1,000mm. Badala ya nondo za Y20, tuliweka Y25. Na pale palipohitajika Y30, tuliweka Y35,” alieleza.

Aliongeza kuwa walikuwa na vibali halali vilivyowaruhusu kuongeza ghorofa nne zaidi juu ya jengo hilo, na hivyo kukataa madai kuwa jengo hilo halikuwa limeidhinishwa.

“Stakabadhi zote tunazo, zikiwa zimeidhinishwa rasmi. Ikiwa mtu atahitaji, tuko tayari kuwasilisha nyaraka zote,” alisema, na kuongeza kuwa yuko tayari kukamatwa iwapo sheria itahitaji.

“Kama ni kushikwa, niko tayari. Tutapambana bwana,” alisema.

Sumra alihitimisha kwa kusema kuwa jengo hilo lilikuwa limepangwa kufunguliwa kati ya Julai na Agosti mwaka huu—lakini sasa, mambo yako mikononi mwa Mungu.