Mbio za Nyani: Mjakazi aliyetoroka na milioni 2.2 za bosi wake akamatwa Malava

Maafisa wa upelelezi wamefanikiwa kumtia mbaroni Bi Fleviar Muhonja Anaya, msichana wa kazi mwenye umri wa miaka 29, anayedaiwa kutoweka na shilingi milioni 2.2 kutoka kwa mwajiri wake jijini Nairobi.

Kwa mujibu wa taarifa ya DCI, Muhonja alikamatwa katika eneo la Malava, Kaunti ya Kakamega, kufuatia msako wa kina uliofanywa na maafisa wa upelelezi kutoka makao makuu ya Nairobi kwa kushirikiana na Kitengo cha Utafiti wa Uhalifu na Ujasusi.

Kwa mujibu wa taarifa hiyo, tukio hilo lilifanyika Machi 16, 2025, wakati mwajiri wake alipokuwa ameondoka nyumbani kwa shughuli zake za kawaida. Baadaye, mlinzi wa usalama aliripoti kumuona Muhonja akiondoka na begi kubwa.

Mshukiwa alipoulizwa, alidai kuwa alikuwa ametumwa na mwajiri wake kupeleka mzigo mahali fulani. Hata hivyo, mwajiri huyo alipojaribu kuwasiliana naye, simu yake ilikuwa imezimwa.

Huku akiwa ameingiwa na wasiwasi, mwajiri huyo alirejea nyumbani haraka na kugundua kuwa pesa zake zilizokuwa zimehifadhiwa chumbani zilikuwa zimetoweka pamoja na msichana huyo wa kazi.

Uchunguzi wa haraka ulianza, ambapo maafisa wa DCI walitumia mbinu za kisasa za upelelezi kufuatilia nyayo za mtuhumiwa hadi Malava.

Baada ya kukamatwa, Muhonja aliwaelekeza maafisa hadi kijiji cha Kapsoi, Kaunti ya Vihiga, ambako shilingi 700,000 zilipatikana nyumbani kwa nyanya yake.

Msako uliendelea hadi eneo la Kipkaren, Kaunti ya Uasin Gishu, ambako maafisa walipata seng’enge aliyoinunua kwa kutumia sehemu ya pesa hizo.

Hatimaye, uchunguzi ulipelekea kufanyika msako katika nyumba yake ya kukodi eneo la South B, Fuata Nyayo, jijini Nairobi, ambapo shilingi 800,000 zilipatikana.

Kwa sasa, Muhonja anazuiliwa katika Kituo cha Polisi cha Capitol Hill akisubiri kufikishwa mahakamani kujibu mashtaka yanayomkabili. DCI imetoa wito kwa waajiri kuwa waangalifu wanapowaajiri wafanyakazi wa nyumbani na kuhakikisha wanakuwa na rekodi sahihi za kibinafsi ili kusaidia katika uchunguzi iwapo kutatokea matukio kama haya.

“Tunahimiza waajiri kuwa waangalifu na kuchukua tahadhari kabla ya kuwaajiri wafanyakazi wa nyumbani,” ilisema DCI katika taarifa yake.

Tukio hili linaongeza idadi ya visa vya uhalifu vinavyohusisha wafanyakazi wa nyumbani, jambo linalohitaji hatua madhubuti ili kudhibiti mienendo ya aina hii.