Kijana aliyetetea JKIA dhidi ya kuuzwa kwa Mhindi kutengenezwa meno

Siku ya Jumatatu, kijana aliyepinga kwa sauti kubwa kuuzwa kwa Uwanja wa Ndege wa Kimataifa wa Jomo Kenyatta (JKIA) wakati wa maandamano ya kitaifa katikati mwa mwaka, Henry Omondi, alitua jijini Nairobi kutoka Kaunti ya Siaya ambako amekuwa akiendelea na masomo ya kiufundi.

Kijana huyo alipata fursa ya maisha yake kwani alitua mjini kwa njia ya anga. Ilikuwa ni mara yake ya kwanza kabisa kupanda ndege na kutua katika JKIA.

Mchekeshaji Eric Omondi aliandamana naye kutoka Uwanja wa Ndege wa Kimataifa wa Kisumu hadi JKIA, kabla ya kuendelea na mambo mengine jijini.

FKF rift deepens as Hussein alleges “coup plot” amid Mariga fallout Football

KCB to dare Tusker in FKF Cup semi-final blockbuster Football

“Ndugu yetu leo Amepanda ndege na kutua JKIA kwa mara ya kwanza kabisa. Tunasherehekea na kumthamini,” Eric alisema.

Walipofika Nairobi, Henry alipelekwa kukutana na Mbunge wa Githunguri Gathoni wa Muchomba ambaye alimuuliza kuhusu safari yake ya ndege.

“Ndege ilikuwa poa. Tumefika poa kwa neema ya Mungu,” Henry alisema.

Mwanasiasa huyo alimshukuru Eric Omondi kwa kumsaidia kijana huyo kutoka mtaani na kumsajili katika chuo cha Ndere Polytechnic kwa kozi ya umekanika.

Gathoni pia aliahidi kumpeleka kwa ununuzi na kumnunulia vitu anavyohitaji ikiwa ni pamoja na nguo na vitu vya sikukuu ya Krismasi.

“Nataka kutengeneza maneno ya sikukuu. Si unaona ata viatu hatuna. Hatuna kiatu ya kukaa huku Nairobi sababu tuko na moja tu ya shule, na imebaki shule. Haiko sura nzuri vile. Pia huyu kijana anahitaji kununuliwa nguo,” Gathoni Wa Muchomba alisema.

Aidha, Gathoni pia aliahidi kutengeneza meno ya Henry, miongoni mwa mambo mengine ambayo hayajafichuliwa iwapo atapata kibali chake.

“Huyu kijana nataka tutengeneze (meno) akinipatia ruhusa. (Akimuangalia Henry) Si tumesema tutatengeneza meno, unataka tutengeneze?.. Tumekubaliana tutatengeneza meno tuwe wanaume poapoa. Si mnaelewa. Alafu maneno mengine yetu ambayo yanatangaza hapa, Maneno ya mama na kijana tutatengeneza,” alisema.

Mbunge huyo pia aliahidi kumsaidia Henry katika masomo yake na kumshauri anapokua.

"Ninajitolea kusaidia (elimu ya Henry) hadi kukamilika. Kwa hivyo sasa tufanyie kazi urembo wake wa kibinafsi na kumpa uwekezaji wa baadaye tunapomshauri kuwa mwanamume halisi. Wacha kazi ianze tukimmaliza,” alisema.

Pia aliwaomba watu wenye mapenzi mema ambao wangetaka kumsaidia Henry kuwasiliana naye au mchekeshaji Eric Omondi.