Naibu Rais mteule Kithure Kindiki ampokea Ruto Kwale kabla ya sherehe ya Mashujaa

Jumapili asubuhi, Waziri wa Usalama wa Ndani na Naibu Rais mteule Kithure Kindiki alimpokea Rais William Ruto katika kaunti ya Kwale kabla ya sherehe za Mashujaa Day.

Kindiki alimpokea Mkuu wa Nchi katika makazi ya Kamishna wa Kaunti ya Kwale.

Naibu rais mteule alijumuika na viongozi wengine akiwemo Katibu Mkuu wa Wizara ya Mambo ya Ndani Raymond Omollo na Gavana Fatuma Achani miongoni mwa viongozi wengine.

Hivi leo, Oktoba 20, nchi inaadhimisha sherehe zake za 61 za Mashujaa.

Siku hii ni ya kuwaenzi waliochangia pakubwa katika harakati za kupigania uhuru wa Kenya kutoka kwa wakoloni.

Ni siku ya kuenzi na kusherehekea ushujaa na kujitolea kwa watu wa Kenya waliopigania uhuru wa nchi.

Usalama umeimarishwa katika eneo kubwa la Pwani kutokana na sherehe hizo.

Pia ni mara ya kwanza kaunti ya Kwale kuandaa hafla hiyo katika uwanja mpya wa Kwale wenye uwezo wa kuchukua watu 10,200.

Wakati wa hafla hiyo, mashujaa 142 watatambuliwa katika kategoria 14, ikijumuisha michezo, hisani, umahiri na tamaduni za kiasili. Baadhi ya mashujaa watapata kutambuliwa baada ya kifo baada ya mchakato wa uhakiki wa kina.

Kulingana na katibu Mkuu wa Utamaduni na Urithi, Ummi Bashir, mashujaa waliochaguliwa wametoa mchango mkubwa kwa jamii, mara nyingi wakihatarisha maisha yao ili kunufaisha jamii zao, huku wengine wakipata kutambuliwa kimataifa kwa juhudi zao.

Hafla hiyo yenye mada kuhusu nyumba za bei nafuu, inatarajiwa kuvutia maelfu, akiwemo Rais William Ruto, ambaye atawatunuku mashujaa 142 kwa michango yao kwa taifa.

Programu ya siku pia itaangazia ufunuo wa mipango muhimu ya serikali chini ya ajenda ya makazi ya bei nafuu.

Maadhimisho ya Siku ya Mashujaa yanajiri mwishoni mwa juma ambalo limeshuhudiwa tukio la kihistoria katika siasa za Kenya. 

Mapema wiki hii, naibu wa rais RigathiGachagua alitimuliwa baada ya bunge la seneti kuidhinisha mashtaka mbalimbali yaliyotolewa dhidi yake.