Mimi na Gachagua tulifanya kosa kumwamini Ruto, kutosaini makubaliano- Mithika Linturi akiri kujuta

Aliyekuwa waziri wa kilimo Franklin Mithika Linturi mnamo Jumamosi alifunguka kuhusu jinsi anajuta kutotia saini mkataba wowote wa makubaliano na rais William Ruto wakati wa kuundwa kwa muungano wa Kenya Kwanza.

Akizungumza wakati wa hafla ya walimu katika eneo la Igembe Kaskazini katika Kaunti ya Meru mnamo Jumamosi, Linturi alibainisha kuwa yeye na Rigathi Gachagua hawakutia saini makubaliano yoyote na rais wakati viongozi wengine wa Kenya Kwanza walipokuwa wakitia saini makubaliano kwa kutumia vyama vya kisiasa.

Linturi alisema kuwa yeye na naibu rais aliyetimuliwa waliamua kumwamini rais Ruto bila makubaliano yoyote, jambo ambalo sasa anajutia.

“Tulipoamua kuenda na William Ruto, tulifanya kazi kwa bidii na kupata serikali. Kitu pekee ninachojuta, ni kwamba wakati kila mtu mwingine alipokuwa akijadiliana kwa kutumia chama cha siasa na kusaini mikataba, mimi na Gachagua tulisema HAPANA, tuendelee tunakuamini. Tulisema ‘tuende hakuna shida’,” Linturi alisema.

Waziri huyo wa zamani alibainisha kuwa kutotia saini makubaliano kulifanya yeye na Rigathi Gachagua kuwa shabaha rahisi ya kuondolewa serikalini.

Kufuatia hayo, aliwataka wakazi wa Meru kujifunza kutokana na makosa ambayo yeye na naibu rais aliyetimuliwa walifanya na kujipanga vyema katika safari iliyokuwa mbele yao.

"Naweza kuwaambia bure na bila hofu yoyote, unapofanya mazungumzo, unapaswa kutoka ukiwa na nguvu, bora na jinsi huwezi kulengwa kwa urahisi. Nitakuambia, leo najuta sana,” alisema.

Mnamo mwezi Julai, Rais William Ruto alivunja baraza lake la mawaziri kwa jumla na kumbakisha tu Waziri Mkuu Musalia Mudavadi.

Ruto aliwatuma nyumbani Mawaziri wote akiwemo Linturi na Mwanasheria Mkuu Justin Muturi.

Wakati wa tangazo lake la Julai 11, Mkuu wa Nchi alisema baraza jipya la mawaziri lingetajwa baada ya mashauriano ya kina katika sekta zote.

Aliongeza kuwa mawaziri wote wakiwa nje ya afisi, maafisa wa uhasibu wa wizara miongoni mwa maafisa wengine wangesimamia utendakazi.

"Nimeamua kuwafuta kazi mara moja makatibu wote wa baraza la mawaziri na mwanasheria mkuu wa Baraza la Mawaziri la Kenya isipokuwa Waziri Mkuu wa Baraza la Mawaziri na Waziri wa Masuala ya Kigeni," Ruto alisema.

Siku chache baadaye, rais alitaja baraza lake jipya la mawaziri akiwakumbuka mawaziri kadhaa ambao alikuwa amewafuta kazi lakini akawaacha baadhi yao wakiwemo Mithika Linturi, Susan Nakhumicha, Peninah Malonza, Zacharia Njeru, Ezekiel Machogu, Ababu Namwamba, Florence Bore, Eliud Owalo, Simon Chelugui, Aisha. Jumwa na Njuguna Ndungu.

Kwa upande wake, Rigathi Gachagua aliondolewa kutoka kiti cha naibu rais siku ya Alhamisi baada ya seneti kuidhinisha makosa kadhaa yaliyowasilishwa dhidi yake.