Mbunge Mwengi Mutuse avunja kimya baada ya seneti kuunga mkono hoja yake ya kumtimua Gachagua

Siku ya Alhamisi usiku, seneti ya Kenya ilipiga kura ya kumtimua naibu wa rais wa pili wa Kenya Rigathi Gachagua.

Mbunge huyo wa zamani wa Mathira alipoteza kiti chake baada ya maseneta kupiga kura kuunga mkono hoja ya kumuondoa afisini iliyokuwa imewasilishwa bungeni na Mbunge wa Kibwezi Magharibi Mwengi Mutuse.

Akizungumza baada ya seneti kuidhinisha mashtaka mbalimbali aliyotoa dhidi ya DP, mbunge huyo wa muhula wa kwanza ambaye alifika mbele ya seneti kama shahidi alisema kuwa anajivunia yaliyojiri na kuwashukuru wabunge wenzake na maseneta kwa kuunga mkono hoja hiyo.

“Mimi ni Mkenya mwenye fahari usiku wa leo. Asanteni, wenzangu, Wabunge, na Maseneta kwa kuidhinisha mashtaka yangu ya kuondolewa madarakani dhidi ya aliyekuwa Naibu Rais Mhe. Rigathi Gachagua,” Mwengi alisema kupitia akaunti zake za mitandao ya kijamii.

Aliongeza, “Kenya haitakuwa vile tena. Sisi tuliopo katika uongozi lazima kuanzia sasa tuishi kwa misingi ya Katiba na sheria zetu. Ninajivunia kuwa nitaingia katika kumbukumbu za historia kama Mkenya wa kwanza kumshtaki Naibu Rais aliye madarakani.”

Mbunge huyo wa Kibwezi Magharibi alikiri kwamba kuwasilisha hoja ya kumtimua Rigathi Gachagua kulichukua ujasiri mkubwa na alifanya hivyo kwa ajili ya nchi.

"Ilihitaji ujasiri na ukakamavu. Ilikuwa ni wajibu kwa nchi yangu. Naipenda Kenya,” alisema.

Maseneta mnamo  Alhamisi usiku waliunga mkono kuondolewa kwa Naibu Rais Rigathi Gachagua.

Maseneta waliidhinisha mashtaka matano kati ya 11 yaliyotolewa dhidi ya Gachagua.

"Seneti imeazimia kumuondoa afisini kwa kumwondoa madarakani MHE. Rigathi Gachagua, Naibu Rais wa Jamhuri ya Kenya. Kwa hiyo, H.E. Rigathi Gachagua akoma kushikilia wadhifa huo,” Spika Amason Kingi alisema.

Mashtaka yaliyoidhinishwa ni pamoja na; shtaka la maoni ya Wanahisa, mashtaka manne ya kuingilia Uhuru wa Majaji na mashtaka matano ya Sheria ya Uwiano na Uadilifu wa Kitaifa.

Pia walishikilia misingi ya sita na tisa kuhusu uhalifu chini ya Sheria ya Uwiano wa Kitaifa na Utovu wa Maadili Mkubwa.